2Cor 5 | GAM | STEP | Alla, nono kanmon, makimb al mormon ge nonekne gaklene ge numb asinga mal embe paro. Nono gaklene golo kal punda ba, God nono numb djell ta take aunda ge, una take naune, man, ge kupill al numb ege ege ye panda. Ge nono gaklene gun panda.

2 Corinthians 5

Are kupill al po mopon mal

1 Alla, nono kanmon, makimb al mormon ge nonekne gaklene ge numb asinga mal embe paro. Nono gaklene golo kal punda ba, God nono numb djell ta take aunda ge, una take naune, man, ge kupill al numb ege ege ye panda. Ge nono gaklene gun panda. 2 Alla ipon nono kimb ye aiyau dje kupill al numb mopon ba dje pille pla yenmon. Kon kunom wormon mal embe nono numb ge al woro mopon ba dje pirmon. 3 Ge nono kupill al po i worpin dal, ell kiwa boll namopon. 4 Nono gaklene ge numb asinga mal pai mormon, nono kimb ye, imb kakmon. Kon kunom worinj mal embe nono makimb gaklene worbon dje nayenmon, man. Nono gaklene gun worbon dje yenmon. Nono makimb gaklene goya paro ba alla wo er gun punda. 5 Nono gaklene gun panda mal God amblokun ye keri. Yene Murble nono awi al ge, wal tuge yem awi, nono gaklene gun panda mal awo, are boll auno dje pille Murble awi.

6 Embe awi pille, nono ege ege aglo gi dje molo kanmon, nono makimb gaklene pai mormon poke nonekne numbine al mormon, nono Iwa Kerman boll numbiye al namormon. 7 Ipon nono une boll pillgi dje wanmormon, une nakanmon, 8 wal kaima panda dje pillgi djimon. Nono makimb gaklene pai numb mormon ge, kere er po Iwa Kerman boll numbiye al mopon dje pirmon. 9 Nono porapora Krais gume al agle mopon paro. Makimb gaklene pai singare ke wopake yepin mal ge une kot ye, top aunda. Embe pille, nono makimb gaklene panda mopon mo, Iwa Kerman boll mopon ge, Iwa Kerman wopake pro mal singare ge yembon dje yenmon.

Una God boll kunda yene ge nono kumbene i taimane worbon

11 No Iwa Kerman boll kand gormon pille no una boll pillgi djine dje kandja djinmon. No singare yenmon mal ge God kando. Alla ye nomane al no singare du dje yenmon mal ye para pille kane yenj dje na pro. 12 No pepa bolo ye aunmon ge no iwa pla molo yembon dje nayenmon, man. No singare yenmon ge, ye wopake kanne dje pepa bolo aunmon. Ye embe kani dal, una gaklene be wopake kane, nomane pakna pille nawinj kambono ge, kandja djine ye to worne kune yenda. 13 Ye no namba mal kaninj? No nomane wopake pai dje kani dal, ye piye no ye wopake moye dje yenmon. Ba alla, no nomane dall paro dje kani dal, God yene djinda. 14 Krais no wopake kani pille no kogo dongall yenmon. Ge no kanmon, iwa taimanta nono dumene i pagle goi. Alla une goi al ge, nono porapora gopin. 15 Una porapora pille goi me ge, una yenekne pille wane namoye. Iwa ge pille wanmoye dje pille goi. Une ga pille golo aglo er wo gun pi iwa ge, kambono une pille wanmoye dje pille goi.

16 Alla ipon, nono makimb nomane paro mal pille una kane nadjinmon. Asa, Krais kond wani mal, nono makimb nomane paika kane djipin ba ipon embe nayenmon. 17 Ge pille, una ta Krais boll moi dal, God ye worda une gun moya. Yene nomane asa pai mal ge pora djindaka, une nomane gun panda moya. 18 Pada mal ge God yene yenda. Asa nono God boll kunda ye mopin ba Krais wo nono i taimane wori mormon. No dje worika una God boll taimane moye dje dje aunmon. 19 Krais po kogo yei al ge God makimb una yene boll i taimane wori. Djingne djangne pai ge une napiya. Alla une no kogo awi, no po una boll kandja dje aumbonka, ga God boll kunda yem namoye, i taimane worbonka moye.

20 Ge pille, Krais dje wori pupin, yene no kandja dje awi mal ge ye dje aunmon. No kandja djinmon al ge, God yene kandja yembe boll dje una aundo, Krais kandjiye al ge, ye na boll kunda alla nayene, ye nomane na boll taimane panda moye we dji. 21 Krais singare ke ta nayei ba alla God nono singare ke yepin ge i Krais moi al wori. Ge Krais kogo yei al, God yene nale al nono wambo napanda, kiwa mopon.